Húnabyggð hefur hlotið styrk til að bjóða upp á rútuferðir frá Blönduósi á fótboltaæfingar á Sauðárkróki. Okkur á Skagaströnd býðst að taka þátt. Fyrirkomulagið gildir fram að jólum og verður þá metið og endurskoðað.

Hvernig virkar þetta fyrir Skagaströnd?

Rútan leggur af stað frá Húnaskóla á Blönduósi og tekur krakkana héðan upp við vegamótin við Laxá, sem eru um 5 mínútur frá Blönduósi. Á heimleiðinni skilar hún þeim aftur þangað. Foreldrar á Skagaströnd þurfa sjálfir að skipuleggja akstur að vegamótunum og þaðan heim, til dæmis með því að skiptast á að keyra. Við hvetjum foreldra til að tala saman og setja upp akstursplan.

Íþróttavika Evrópu (BeActive) verður haldin á Skagaströnd enn eitt árið. Boðið verður upp á fjölbreytta viðburði fyrir alla aldurshópa og við hvetjum alla til að mæta á sem flesta þeirra.

Nú fara æfingar að hefjast á ný af fullum krafti þann 7. september. Skráningarform er komið á vefsíðuna okkar. Eitt gjald er tekið fyrir þátttöku hvers barns, 20.000 krónur. Þetta gildir hvort sem tekið er þátt í einni íþrótt eða öllum. Sendið „Kvittun takk" á tölvupóstinn ungmennaf.fram@gmail.com til að fá kvittun uppá frístundastyrkinn frá sveitarfélaginu. Kvittunin mun sýna greiðslu fyrir sumarnámskeiðin líka. Ef óskað er eftir dreifingu á greiðslum ekki hika við að hafa samband.